පක්ෂේ පෞද්ගලික දේපලක් ද? සිරිසේනගේ කොන්ද පන නැති කම පක්ෂය විනාශ කළා…… – චන්ද්‍රිකා දායාසිරිට ලියයි…..!

0

ශ්‍රි ලංකා නිදහස් පක්ෂයේ සංවිධායකයින් 90% පමණ ශ්‍රි ලංකා පොදුජන පෙරමුණට හා ගෝඨාභය රාජපක්ෂ වෙත සහය ලබා දීමට අකමැත්ත පල කොට තිබියදී ගෝඨාභය රාජපක්ෂ වෙත සහය දැක්වීමට පාර්ලිමේන්තු මන්ත්‍රිවරුන් තීරණය කළේ කවර පදනමකින්ද යන්න හිටපු ජනාධිපතිනිය චන්ද්‍රිකා බණ්ඩාරනායක කුමාරතුංග විමසා සිටිනවා.

පක්ෂයේ මහලේකම් දයාසිරි ජයසේකර වෙත ඉංග්‍රිසි භාෂාවෙන් ලිපියක් යොමු කරමින් හිටපු ජනාධිපතිනිය මේ බව දක්වා ඇති අතර ‘ඔබේ පෞද්ගලික අවශ්‍යතාවයට පමණක් සීමා නොවී අපගේ වටිනා පක්ෂය විනාශ කිරීමට ඉඩ නොදෙන්නැයි’ එහිදි ඉල්ලා තිබෙනවා.

හිටපු ජනාධිපතිනිය විසින් පාර්ලිමේන්තු මන්ත්‍රි දයාසිරි ජයසේකර වෙත යවනු ලැබු ලිපියේ සිංහල අනුවාදය පහතින්,

හිතවත් දයාසිරි,

අපගේ සංවිධායකයින්ගෙන් 90% කට වඩා වැඩි පිරිසක් තමන් ‌පොහොට්ටුව සමග ‌එක්වීමකට විරුද්ධ බව ප්‍රකාශ කර ඇති විට, ඔබ ගෝටාට සහාය දීමට තීරණය කරන්නේ කෙසේද? මෙය ශ්‍රී ලංකා නිදහස් පක්ෂය මුලුමනින්ම පාවාදීමකි.

පක්ෂයේ සභාපති ධූරය අතහැර දැමීමට තමා කැමති බව මෛත්‍රි පවසා තිබේ නම්, සභාපති ධූරය භාර ගැනීමට සහ පක්ෂය නැවත ගොඩනැංවීම සඳහා අපි ඔබට සහාය දෙන්නෙමු.

අපේ පක්ෂය දුර්වල වූයේ අප එක්සත් ජාතික පක්ෂය සහ අනෙකුත් පක්ෂ සමඟ සන්ධානයට සම්බන්ධ වූ නිසා නොවේ. අපේ නායකයාට සන්ධානයට නායකත්වය දීමට ශක්තියක් හා දැක්මක් නොතිබූ නිසාත්, රාජපක්ෂලාගේ කුමන්ත්‍රණ වලට රැවටීමත්, යහපත විනාශ කර පක්ෂය අවුල් කිරීමත් ඊට හේතු විය.

මෛත්‍රිට ආණ්ඩුවේ බලය පාවිච්චි කිරීමේ දක්ෂතාවයක් තිබුනේ නම් සහ ශ්‍රී ලංකා නිදහස් පක්ෂය ගොඩනඟා නීතිය නිසි ලෙස ක්‍රියාත්මක වීමට ඉඩ දී රාජපක්ෂලාගේ මිනීමැරුම් සහ මංකොල්ලකෑම්වලට එරෙහිව පියවර ගත්තේ නම්, රට සහ ශ්‍රී ලංකා නිදහස් පක්ෂය මේ වන විට ඉතා ශක්තිමත් වනු ඇත.

එබැවින්, ශ්‍රී ලංකා නිදහස් පක්ෂයට වඩාත්ම ආදරය කරන හා දන්නා පුද්ගලයා ලෙස මම ඔබට ආයාචනා කරමි. ඔබේ පෞද්ගලික අවශ්‍යතාවයට පමණක් සීමා නොවී අපගේ වටිනා පක්ෂය විනාශ කිරීමට ඉඩ නොදෙන්න.

චන්ද්‍රිකා බණ්ඩාරනායක කුමාරතුංග



LEAVE A REPLY

Please enter your comment!
Please enter your name here